scrivi

Una storia di Marvin

Allora piglio

133 visualizzazioni

2 minuti

Pubblicato il 18 gennaio 2020 in Poesia

0

Je so furtunato mmiezo a 'sta gente maltrattata

m'aizo spensierato 'a matina, jesco e guardo mmiezo 'e cancellate

e pettramente cerco l'uocchie tuoje a chill'ato lato.

Quanno penso a quanti cose aggio assaggiato

me sento spuma 'ngopp 'a ll'onna 'e nu suspiro,

me sento vita mmiezo a tanti facce stanche,

me sento brezza annanz' 'a prora 'e chesti barche.

Me sento responsabile pe' mme e pure pe ll'ate,

me penso ca si campo je e nun campano lloro

allora 'sta libertà d' 'a mia è 'nu velluto d'oro,

ca me coccola e me dice 'e guardà 'o lato allà,

ca m'invita a me ne fottere 'e sta gente ccà,

ma je me guardo dind' all'uocchie annan' 'o specchio

e veco sulamente chesta faccia amariggiata

me penso n'ato juorno ngopp' 'o divano accartucciato,

e me sonno 'a cuntentezza 'e me a viecchio.

Penso che sta libertà d' 'a mij è pure d' 'a toja

e forse si ce provo po' ce riesco a t' 'a purtà

e forse si ce provo po me vene 'e respirà

e forse, mentre provo, trovo ancora ll'uocchie tuoje

ca na vota ancora me raccontano d' 'e ghiacciai 'e ll'Argentina.

Ancora sento 'a brezza ca me gela 'e rine

me giro e veco a terra mia fatta 'e rovine,

relitti umani, cane 'e canciello e ricuttare,

uommene vinti, femmene sfasciate e lacreme amare,

po' me giro ancora verso 'o mare 'e ponente,

pe spià 'o sole ca vasa 'a terra, 'o tramonto

pe me sentì 'e scarfà ancora 'a fronte

ma 'e tramonte nun se vive d'altronde

e areto se sente forte l'allucco d' 'e tuone,

ca ccà 'o tiempo scorre sempe e nun perdona

'e distrazioni 'e n'attimo, 'e parole non dette,

'nu patto spezzato, na mane non stretta.

'A vita corre, passa ed è già ricordo,

'a morte aspetta, ride ed è già traguardo,

allora piglio e me dico "mo m' 'a jioco 'sta partita",

allora piglio e dico << mo m' 'a magno chesta vita>>.


Nessuno ha ancora commentato, sii tu il primo!

Ottimo! Visita la libreria per gestire i tuoi magazine

×
!
La tua sessione è scaduta! Effettua di nuovo il login e spunta Ricordati di me per rimanere sempre connesso e non perdere i tuoi progressi!
Ottimo!

Controlla la tua email per reimpostare la tua password!

×