Scurdat' 'a Ddio.

Nuje simme gli invisibili
simme 'e scurdati 'a Ddio
simme zoccole dind' 'e tombini
simme vive e nun ce vulite credere.
Tenimmo uocchie pe' chiagnere e vocche pe' ridere,
mane pe' stregnere e piedi pe' correre

nun tenimmo n'affetto, nun tenimmo nu lietto,

figurammece 'o tetto, 'a vernata c'aspetta.
Ve passamme vicino ma nun ce vedite,
v'allungammo 'na mane, nun 'a pigliate.

'A sentite 'sta puzza? È puzza 'e miseria.
simmo 'e fantasme ca ve passano attuorno,
ca chiedene 'o ppane pure stu juorno,
scurdate all'uommene, nisciuno ce nota,
avite chiuso ll'uocchie pure sta vota.
Scampamm' 'a morte pe' c'aggrappà 'a 'sta vita,
ma simme stanc', simmo sfiniti,
'a presa è lasca e s'arapeno 'e dete,
ce piglia 'a droga, ce piglia 'a sete,
ce piglia 'a famme, ce pigliano 'e botte,
ce piglia 'o terrore 'e murì stanotte
e doppo sentite che puzza 'e cancrena.
Po' ce piglia 'a freva
'e nun tené chello ca tenite vuje,
ce piglia 'a 'rraggia
'e nun puté campà comme campate vuje,
pecché simme fatte 'e carne e sanghe pure nuje,
Sapimmo 'e lacreme, sapimmo 'e sudore
e tenimmo 'a faccia d' 'a gente che more.
Pecché nuje simme 'e pezzienti,
vittime d' 'a storia e vittime d' 'a vita,
nuje simme nati cundannati,
vuje ve sentite 'e magistrate,
è stu munno 'nfame che c' 'a 'nguaiati,
vuje site sulo nati furtunati.
Nuje, invece

simme uommene c' 'affogano,
femmene ca se venneno,
ccriature ca chiagneno.
Nuje simme 'a gente ca nun se sente,
nuje simme 'a gente ca nun se vede.